Улс төрийн нам, эвслүүд Монгол Улсын 2021 оны Ерөнхийлөгчийн сонгуульд нэр дэвшүүлэх хүнээ өнөөдөр эцэслэн тодрууллаа.

Тодруулбал, МАН-аас У.Хүрэлсүх, АН-аас С.Эрдэнэ, нөгөө фракцаас нь Н.Алтанхуяг, Зөв хүн электорат эвслээс Д.Энхбат нэр дэвшихээр болжээ.

УИХ-д суудал авсан учир дээрх эвсэл, намууд хүнээ нэр дэвшүүлж буй.

МАН болон Зөв хүн электорат эвсэл хуулийн дагуу нэг нэг хүнийхээ материалыг бүрдүүлж СЕХ-нд өгөхөд асуудал үүсэхгүй, Ерөнхийлөгчид нэр дэвшигчээр бүртгэх байх. 

Харин АН албан ёсны даргагүй, хоёр фракц нь нэгдэж чадалгүй тус тусын хүнээ нэр дэвшүүлж байна. СЕХ нэгийг нь л нэр дэвшигчээр бүртгэнэ. Тэр нь С.Эрдэнэ байх гэж харж буй хүн олон. Магадгүй хоёуланг нь ч бүртгэхгүй байх боломжтой.

Ямартай ч иргэдийн аль хэдийнэ таньдаг болсон 4 эрхмийг нэр дэвшүүлэхээр болсноо нам, эвслүүд зарлалаа. 

Ерөнхийлөгчийн сонгуулийн санал хураалт 6 дугаар сарын 09-нд явагдана.